Олий Мажлис Қонунчилик палатасида “2026 йил учун Ўзбекистон Республикасининг Давлат бюджети тўғрисида”ги қонун лойиҳаси муҳокама қилинди.
Қайд этилишича, келгуси йилда ижтимоий соҳаларга 220 триллион сўм ажратиш режалаштирилган бўлиб, бу жами харажатларнинг 54,7 фоизини ташкил этади.
Шу билан бирга, бюджет харажатларининг 25,5 фоизи миқдоридаги маблағлар таълим ва фан соҳаси, 12,1 фоизи соғлиқни сақлаш ҳамда 4,2 фоизи аҳолини ижтимоий ҳимоя қилиш жами харажатлари учун ажратилиши кўзда тутилган.
Муҳокама давомида депутатлардан бири дарсликлар билан боғлиқ масалада, уларни янгилаш мақсадларига йўналтирилаётган маблағлар йилдан йилга кўпайтирилаётгани, бироқ, дарсликлар таъминоти айрим мактабларда ҳамон муаммолигича қолаётганини таъкидлаган.
Кўриб чиқиш жараёнида бюджет ҳисобидан 2026-йилда маҳаллий йўналишларда темир йўл йўловчи ташиш хизматини кўрсатишда кўриладиган зарарни қоплаш учун 700 миллиард сўм ажратилиши кўзда тутилганига ҳам эътибор қаратилган.
2026-йилда давлат бюджети даромадлари 368,9 триллион сўмни ташкил этиши кутилмоқда.Таққослаш учун, жорий йилги даромад кутилмалари 345,2 триллион сўм бўлган. Умумий харажатлар миқдори эса 402,4 триллион сўмни, яъни ЯИМнинг 20,4 фоизини ташкил этиши кутилмоқда.
