Умра тадбирини ташкил этишга оид реклама қонунчилиги бузилиши юзасидан 10 дан ортиқ ҳолатлар аниқланди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси хабар берди.
Қайд этилишича, Рақобат қўмитаси томонидан оммавий ахборот воситалари ва интернет тармоқларида жойлаштирилган материалларнинг “Реклама тўғрисида”ги қонун талабларига мослиги юзасидан ўрганиш ишлари олиб борилган. Туроператорлар томонидан Умра тадбирини ташкил этиш ва ўтказишга оид берилган рекламалар ўрганилган.
Маълум бўлишича, Сурхондарё ва Фарғона вилоятлари ҳудудий бошқармаси томонидан 2 та –“Sharofiddin Travel” ва “Fayz Tour Travel” маъсулияти чекланган жамиятларнинг туроператорларига нисбатан лицензия ҳужжатлари мавжуд бўлмаган ҳолда рекламалар жойлаштиргани аниқланган.
Шунингдек, қўмитанинг Қорақалпоғистон Республикаси, Самарқанд, Сурхондарё, Наманган, Фарғона, Хоразм вилояти ва Тошкент шаҳар ҳудудий бошқармалари томонидан жами 12 та – “Marmaristour.uz”, “rozumbetovjurabek”, “uzmobile_aviakassa”, “Samarqanddan Umra ziyorati” Instagram саҳифаси, “Umra Ziyorati”, “Fazliddin Umra jamiyati”, “Muborak safar”, “Qo‘qimboyliklar”, “Saudiyaga sayohat”, “Umra rasmiy”, “Aviakassa721”, “Nursafar” Telegram-каналлари эгалари қонунчилик талаблари бузилиши юзасидан маъмурий жавобгарликка тортилган.
Ушбу ўрганиш якунлари юзасидан қонунчиликда белгиланган тартибда тегишли чоралар кўриш ишлари бошланган.
