Алишер Кличев “Навоий халқаро аэропорти” масъулияти чекланган жамияти директори этиб тайинланди.
Вилоят ҳокимлиги ахборотига кўра, ҳоким Нормат Турсунов иштирокида 4 февраль куни бўлиб ўтган мажлисда Кличев лавозимга тайинлангани маълум қилинди.
У бунга қадар “Ўзаэронавигация” маркази ДУК Телекоммуникация ва ахборот технологиялари бошқармаси бошлиғи сифатида фаолият юритган.
Навоий халқаро аэропорти директори вазифасини бажарувчи Алишер Неъматуллаевич Кличев 2020 йил 22 октябрь куни ишдан бўшатилганди. Ҳаво порти ходимлари 2019 йил 11 декабрдан бери аэропортни бошқариб келаётган ва ишдан бўшатилган директорни қайта тиклаш тўғрисида мурожаат билан чиққан.
290 дан ортиқ ходим имзолаган очиқ хатда Алишер Кличев ишнинг биринчи кунлариданоқ ходимлар билан учрашувлар ўтказгани, уларнинг оилаларидаги аҳвол, меҳнат шароитлари билан танишгани, аниқланган камчиликлар зудлик билан бартараф этила бошлангани қайд этилган.
29 октябрь куни Uzbekistan Airports Алишер Кличевнинг ишдан бўшатилгани ҳақидаги шарҳни эълон қилган. Унда таъкидланишича, Ўзбекистондаги халқаро аэропортлар директорларини тайинлаш ва лавозимидан озод қилишда компания “Акциядорлик жамиятлари тўғрисида”, “Масъулияти чекланган ва қўшимча масъулиятли жамиятлар тўғрисида”ги қонунлар ва Меҳнат кодексига амал қилади.
Тайинлов Шавкат Мирзиёев 2 февраль куни Навоий халқаро аэропорти фаолияти самарадорлигини ошириш ҳамда авиация корхоналарини трансформация қилиш бўйича тайёрланган тақдимот билан танишгандан сўнг эълон қилинди.
