Солиқ қўмитаси 2025 йилда солиқ ҳуқуқбузарликлари ҳақида нечта мурожаат йўллангани ва хабар қилганларга улар бўйича қанча мукофот тўланганини маълум қилди.
Қайд этилишича, ўтган йилда “Солиқ ҳамкор” тизими орқали соҳавий ҳуқуқбузарликлар ҳақида 112 412 та мурожаат келиб тушган.
Бунда мурожаатлар ҳуқуқбузарликлар тури бўйича қуйидагича:
- 101 23 таси харид чеки бермаслик;
- 4 185 таси тўловни пластик карта орқали қабул қилмаслик;
- 236 таси пластик карта учун харид суммасини ошириш;
- 6 755 таси бошқа турдаги ҳуқуқбузарликлар.
Қўмита маълум қилишича, мурожаатларнинг 56 617 таси такрорий бўлганлиги ёки шикоят келиб тушган тадбиркорлик субъектида текширув давом этаётганлиги сабабли кўриб чиқилмаган. Мурожаатлар асосида 49 025 та сайёр солиқ текшируви ўтказилиб, 98,8 фоиз ҳолатда ҳуқуқбузарлик тасдиқланган.
Шундай ҳолатлари ҳақида хабар берган фуқароларга 48 602 та ҳолат бўйича ундирилган жарима суммасидан 20 фоизи, яъни 33,7 миллиард сўм мукофот тўланган.
Ўзбекистонда 2025-йилда савдо ва умумий овқатланиш солиқдан энг кўп қочган соҳа бўлган.
Бунда солиқларни тўламаслик хавфи юқори бўлган 3 минг 481 та корхонада текширув ўтказилди. Текширув ўтказишдан аввал мазкур субъектлар 11,7 триллион сўмлик солиқларни тўламаслик хавфи юқори дея баҳоланган. Аудит давомида эса кўзда тутилган сумма янада кўпроқ, яъни 13 триллион сўмга етган.
Солиқ қўмитаси республикада солиқларни ихтиёрий тўлаш даражаси қанчага етганини ҳам маълум қилганди.
Ўтган йилда республика миқёсида юридик ва жисмоний шахслар томонидан солиқ мажбуриятларининг ихтиёрий бажарилиши 97 фоизга етган. Бунда энг яхши кўрсаткич, яъни 98 фоиз йирик солиқ тўловчилар бўйича ҲСИ (ҳудудлараро солиқ инспекцияси)да қайд этилди.
