Самарқанд шаҳрида ота-онасидан мерос қолган уйни бўлишиш масаласида келиб чиққан низо ортидан опасини ўлдирган ака-укаларга суд ҳукми ўқилди.
Аниқланишича, 1984-йилда туғилган Баҳодир ва 1982-йилда туғилган Баҳром Саидовлар (барча исм-шарифлар ўзгартирилган) онасидан мерос қолган уйни сотмоқчи бўлган опаси Хайринисо билан бир неча йилдан бери низолашиб келган. Шу сабабли ака-ука уни қасддан ўлдириш бўйича олдиндан жиноий режа тузишиб, қулай фурсатни кутган.
2025-йилнинг 6 февраль куни соат 16:00 ларда опаси уйга келган вақтида икковлон қўлларидаги лом ва мих суғуриш асбоби билан унинг бош, елка ва қўл соҳаларига бир неча зарба берган. Олинган оғир тан жароҳатлари натижасида Хайринисо Саидова ҳодиса жойида вафот этган.
Қотилликдан сўнг ака-ука жиноят изларини яшириш учун марҳуманинг жасадини гилам ва полиэтилен целлофанга ўраб, “ВАЗ-2103” автомашинасида Самарқанд тумани ҳудудидан оқиб ўтувчи Янгиариқ канали ёқасидаги табиий чуқурликка олиб бориб, кўмиб юборишади.
Лом ва мих суғуриш асбоби ҳамда жабрланувчига тегишли шахсий буюмларни эса Самарқанд тумани Хишрав қўрғонидаги ташландиқ жойга кўмиб ташлашади. Уйнинг дарвозахонасидаги қон доғларини эса қириб, канализацияга оқизиб юборишади ва ўша жойни бетон қоришмаси билан қоплаб, жиноят изларини яширишга уринишади.
Март ойида судланувчиларнинг акаси Шаҳрам Саидов Самарқанд шаҳар прокуратурасига мурожаат қилиб, опаси Хайринисонинг бедарак йўқолгани ҳақида хабар беради. Салкам икки ой давом этган қидирув натижаларидан сўнг марҳуманинг мурдаси “Дўстлик” маҳалласи томонга кирувчи йўлдаги табиий чуқурдан топилади.
Жиноят ишлари бўйича Самарқанд шаҳри суди ака-укаларни Жиноят кодексининг 97-моддаси 2-қисмига (қасддан одам ўлдириш) мувофиқ айбли деб топди. Уларнинг ҳар бирига 15 йил муддатга озодликдан маҳрум қилиш жазоси тайинланди. Жазо умумий тартибли колонияда ўталиши белгиланди.
