Зарафшон дарёсида ноқонуний балиқ овлаганлар табиатга 130 миллион сўмдан ортиқ зарар етказди. Бу ҳақда Экология, атроф-муҳитни мҳуҳофаза қилиш ва иқлим ўзгариши вазирлиги хабар берди.
Қайд этилишича, Самарқанд вилояти Экология, атроф-муҳитни муҳофаза қилиш ва иқлим ўзгариши бошқармаси, Пахтачи туман Экология бўлими ҳамда туман ИИБ томонидан навбатдаги тунги назорат рейд тадбири ўтказилган.
Рейд давомида туман ҳудудидан оқиб ўтувчи Зарафшон дарёсида 4 нафар фуқаро томонидан ноқонуний тарзда балиқ овланиб, транспорт воситасига юкланаётгани маълум бўлди. Ҳуқуқбузарлар тўқай ичига яширинишга уринганида инспекторлар томонидан ушланган.
Ҳолат юзасидан далилий ашёлар: 105 бош 6 турдаги балиқ, ов қуроллари ва 2 та резина қайиқ олиб қўйилган. Транспорт воситаси эса жарима майдонига жойлаштирилган.
“Қолаверса, ҳуқуқбузарларга табиатга 130 миллион 149 минг сўм зарар етказилганлиги ҳисобланган. Ҳужжатлар ҳолатга ҳуқуқий баҳо бериш учун ҳуқуқни муҳофаза қилувчи органларга юборилмоқда”, дейилади хабарда.
