Қозоғистонлик 22 ёшли йигит БААда умрбод озодликдан маҳрум этилди. Бу ҳақда Қозоғистон Ташқи ишлар вазирлиги хабар қилди.
Вазирлик маълумотига кўра, 2026 йил 18 март куни Дубайнинг биринчи инстанция суди Қозоғистон фуқаросини бир қатор оғир жиноятларда айбдор деб топиб, уни умрбод қамоқ жазосига ҳамда жарима тўлашга ҳукм чиқарган.
Йигитнинг яқинлари унинг 2024 йилда ишлаш учун БААга кетгани ва у ерда ҳайдовчи бўлиб ишлаганини айтган. Қариндошлари унинг айбига ишонмасликларини, у туҳмат қурбони бўлгани мумкинлигини билдирган.
Қозоғистон ташқи ишлар вазири ўринбосари Алибек Бакаев йигитни экстрадиция қилиш масаласи ҳозирча муҳокама қилинмаётганини маълум қилган.
“Бу Дубай шаҳрининг биринчи инстанция судининг қарори. Апелляция шикояти берилган, тегишли тартиблар мавжуд. Шу сабабли, ҳозирча экстрадиция ҳақида гап йўқ. Аввало бутун суд жараёни якунланиши керак. Шундан кейингина қарор қабул қилинади”, деган Бакаев.
Унинг сўзларига кўра, масала Бирлашган Араб Амирликлари қонунчилигига мувофиқ ҳал этилади. Ҳозир бу иш билан адвокатлар ва Қозоғистоннинг бош консуллиги шуғулланмоқда.
“Ҳозирда жавоб кутилмоқда. Дубайдаги Қозоғистон бош консуллиги ўз ваколатлари доирасида зарур консуллик-ҳуқуқий ёрдам кўрсатишда давом этмоқда. Ушбу масала вазирлик назоратида”, деган вазири ўринбосари.
