Ҳиндистоннинг Мумбай шаҳри яқинидаги кимё заводида 2 март куни қайд этилган заҳарли газ сизиб чиқиши ортидан камида 2600 киши хавфсиз жойга кўчирилди. Кучли заҳарли тутун атрофдаги ҳудудларни қоплаб олгани сабабли фавқулодда чоралар кўрилди. Бу ҳақда The Independent хабар берди.
Ҳодиса Ҳиндистоннинг молиявий пойтахтидан қарийб 100 километр шимолда жойлашган Боисар саноат ҳудудида юз берди. Расмийларнинг маълум қилишича, сизиб чиққан модда — олеум (тутовчи сулфат кислота) бўлиб, у ювиш воситалари, бўёқлар, портловчи моддалар ва фармацевтика маҳсулотлари ишлаб чиқаришда қўлланадиган ўта коррозияли кимёвий моддадир.
Заҳарли тутун заводдан 5 километр масофагача тарқалган. Эҳтиёт чораси сифатида яқин атрофдаги мактабларнинг 1600 нафар ўқувчиси ва қўшни заводларнинг мингдан ортиқ ишчиси зудлик билан эвакуация қилинди.
Округ маъмурияти баёнотига кўра, сизиб чиқиш маҳаллий вақт билан соат 14:00 атрофида Бҳагериа Industries Ltd компаниясига қарашли заводдаги 2500 литрли олеум резервуаридан бошланган.
Олеум — сулфат кислотасининг консентрланган шакли бўлиб, ҳаво билан алоқага киришганда олтингугурт триоксиди буғларини чиқаради. У кўз ва нафас йўлларининг оғир яллиғланишига, юқори консентрацияда эса тери ва ўпканинг кимёвий куйишига олиб келиши мумкин.
Ҳозирча уч киши кўзининг енгил яллиғланиши билан шифохонага ётқизилгани хабар қилинди. Жиддий жароҳат олганлар ҳақида маълумот йўқ. Кучли шамол туфайли оқ тутун булути саноат ҳудуди бўйлаб тез ёйилиб, аҳоли ва ишчилар орасида ваҳима келтириб чиқарди.
Дастлаб тутун консентрацияси ўта юқори бўлгани сабабли қутқарувчилар сизиб чиқиш манбасига яқинлаша олмаган. Кейинчалик махсус нафас олиш аппаратлари билан жиҳозланган мутахассислар завод ҳудудига кириб, тутунни тўсиш учун сизиб чиқаётган идиш устига қум солинган қопларни жойлаштиришди.
Полиция суперинтенданти Ятиш Дешмух аҳолини ваҳимага тушмасликка чақирди. Расмийлар одамлардан уйлардан чиқмасликни ва расмий кўрсатмаларга амал қилишни сўрамоқда. Ҳозирча ҳодиса сабаби номаълум, тергов ишлари бошланиши кутилмоқда.
Ҳиндистонда аҳоли зич жойлашган ҳудудлар яқинидаги саноат марказларида бундай кимёвий авариялар тез-тез содир бўлиб туриши хавфсизлик стандартлари борасидаги хавотирларни кучайтирмоқда. Боисар ҳудуди Махараштра штатининг кимё, фармацевтика ва муҳандислик корхоналари жойлашган йирик саноат коридорларидан бири ҳисобланади.
