“Толибон” бурқа киймаган аёлларга давлат муассасаларига киришга рухсат бермасликка қарор қилди. Бу ҳақда манбаларга таяниб, Hasht-e Subh Daily хабар берди.
Маълум қилинишича, сўнгги бир неча кун ичида аёлларнинг давлат идораларига кириши чекланган. Бу тақиқ Аҳолини рўйхатга олиш идораси, Таълим вазирлиги ва Қамоқхоналар бош бошқармасида кузатилган. Ҳирот вилоятида эса “Толибон” камида 50 нафар аёлнинг вилоят таълим бошқармасига киришини тўхтатган.
Қарор ҳозирча Афғонистоннинг бир неча вилоятларида амалда жорий этилган. Манбаларга кўра, “Толибон” бу орқали аёлларни бурқа кийишга ундашни мақсад қилган.
БМТнинг Афғонистондаги ёрдам миссияси (UNАМА) ўзининг сўнгги ҳисоботида Кунар, Қандаҳор ва Хост вилоятларида бурқасиз аёллар шифохоналарда даволанишдан маҳрум этилганини қайд этган. “Толибон” шифокорларга ҳижобсиз аёл беморларни қабул қилмаслик ҳақида огоҳлантириш берган.
Бундан ташқари, аёлларнинг шифохона ва соғлиқни сақлаш марказларига киришига чекловлар қўйилган. Афғонистонда қиз-аёлларнинг юқори синфда ўқиши ва университетда таҳсил олиши тақиқланган. Акушерлик ва ҳамшираликка ўқиётган аёлларга дарсларга келмаслик буюрилган. Шу тариқа улар таълимни тугатиш имкониятидан маҳрум бўлган.
Афғонистонда аёлларга нисбатан жорий қилинган айрим тақиқлар қуйидагилар:
- афғонистонлик аёлларнинг БМТ идораларида ишлаши;
- эркакларга аёллар учун кийим тикиш;
- аёлларнинг эркак шифокорларга бориши;
- аёлларнинг шифохонага ёлғиз бориши;
- аёлларнинг истироҳат боғига ташриф буюриши;
- оилалар ва аёлларнинг боғлари ёки яшил ҳудудлари бўлган ресторанларга кириши;
- аёллар овози эшитилган рекламаларни эфирга узатиш;
- аёлларнинг сотувчилари билан савдолашиши тақиқланган.
