Хитойда учар автомобилларни синов тариқасида ишлаб чиқариш йўлга қўйилди. Серияли ишлаб чиқариш ва етказиб бериш 2026 йилдан бошланади. Бу ҳақда Xinhua агентлиги хабар берди.
Автомобилларни XPeng компанияси ишлаб чиқармоқда. Транспорт воситаси вертикал учиш ва қўниш имкониятига эга. Ишлаб чиқариш Хитой жанубида жойлашган дунёдаги биринчи интеллектуал заводда амалга оширилмоқда.
Завод йилига 10 минг дона олинадиган авиация модулларини ишлаб чиқаришни режалаштирган. Дастлабки қувват эса 5 мингтани ташкил этади. Завод тўлиқ қувват билан ишлай бошлагач, ҳар 30 дақиқада битта учиш аппаратини йиғиш имкониятига эга бўлади.
XPeng компанияси маҳсулот тақдимотидан буён деярли 5 мингта учар автомобиль учун буюртма олган. Учар автомобиль 6 ғилдиракли ер транспорт воситаси ва олинадиган вертикал учиш-қўниш электр аппаратидан иборат. У автоматик ва қўлда бошқариладиган парвоз режимларига эга. Автоматик режим йўналишни ақлли тарзда режалаштириш ҳамда бир тугма орқали учиш ва қўнишни амалга ошириши мумкин.
