Қашқадарё вилоятининг Чироқчи туманида ЙПХ ходимини видеога олиб, тармоққа жойлаган ҳайдовчига 7 суткага қамоқ жазоси берилди. Бу ҳақда вилоят ЙҲХБ хабар берди.
Маълум қилинишича, ҳайдовчи 5 октябрь куни Чироқчи деҳқон бозори олдида ЙПХ инспекторлари томонидан ўтказилаётган рейд вақтида тўхтатилган ва унга нисбатан маъмурий баённома тузилган. Бунда ЙПХ ходими билан суҳбатни видеога олган ва Instagram’даги саҳифасига жойлаган.
Жиноят ишлари бўйича Чироқчи туман суди томонидан фуқаронинг хатти-ҳаракатига ҳуқуқий баҳо берилди. Ҳайдовчи Маъмурий жавобгарлик тўғрисидаги кодекснинг 195-2-моддаси, яъни ҳуқуқни муҳофаза қилувчи орган ходимларини фото ва видео тасвирга олиб, уларни обрўсизлантириш мақсадида тарқатишда айбдор деб топилиб, унга нисбатан 7 сутка маъмурий қамоқ жазоси тайинланди.
Ҳайдовчи қилмишидан пушаймонлигини айтди. Қашқадарё вилояти ЙҲХБ ҳар қандай масала юзасидан йўл-патрул хизмати инспекторларининг хатти-ҳаракатларидан норози бўлган фуқаролардан қонуний тартибда мурожаат қилишга чақирди.
