Марказий Осиё мамлакатларининг ўзаро товар айирбошлаш ҳажмини 20 миллиард долларга етказиш режалаштирилмоқда. Бу ҳақда 13 ноябрь куни Тошкентда бўлиб ўтган Марказий Осиё ва Озарбайжон мамлакатларининг савдо ва инвестициялар вазирлари кенгашининг биринчи йиғилишида маълум қилинди.
Ўзбекистон Инвестициялар, саноат ва савдо вазирлиги матбуот хизматининг хабар беришича, йиғилиш давомида Марказий Осиё мамлакатларининг савдо ва инвестиция вазирлари ўзаро савдони ривожлантириш ва саноат интеграциясини чуқурлаштиришга қаратилган комплекс чораларни муҳокама қилди.
Товар айирбошлаш ҳажмини 20 миллиард долларга етказиш бўйича самарали механизмларни яратиш, Маde in Central Аsia бренди остида қўшма ишлаб чиқариш майдонларини шакллантириш, шунингдек, халқаро молия институтлари ва йирик инвесторларни инфратузилма ҳамда саноат лойиҳаларига жалб этиш масалаларига алоҳида эътибор қаратилди.
Таъкидланишича, Ўзбекистоннинг Марказий Осиё давлатлари билан ўзаро савдоси барқарор суръатларда ўсиб бормоқда. Агар 2017 йилда товар айирбошлаш ҳажми 3,2 миллиард долларни ташкил этган бўлса, 2024 йилга келиб бу кўрсаткич икки баравардан кўпроққа ошиб, 6,9 миллиард долларга етди. Хусусан, Қозоғистон билан савдо ҳажми 4 миллиард долларга яқинлашмоқда, Қирғизистон билан – 700 миллион долларга, Тожикистон билан 570 миллион доллардан ошган, Туркманистон билан эса сўнгги беш йилда савдо икки баравардан кўпроққа ошиб, 1,15 млрд долларга етди. Озарбайжон билан савдо айланмаси эса йил бошидан буён 13 фоизга ўсганi қайд этилди.
Йиғилиш давомида божхона ва чегара тартиб-таомилларини янада оптималлаштириш, транспорт-логистика инфратузилмасини уйғунлаштириш, ишлаб чиқариш занжирларини бирлаштира оладиган саноат ҳабларини яратиш зарурлиги таъкидланди. Саноат кооперациясини ривожлантириш, хом ашё ва технологик имкониятларни биргаликда ўзлаштириш, юқори қўшилган қийматга эга тайёр маҳсулотлар экспортини кенгайтириш масалалари алоҳида муҳокама қилинди.
Gazeta’нинг ёзишича, йиғилишда инвестициялар, саноат ва савдо вазири Лазиз Қудратов 2026 йилда Самарқандда Марказий Осиё ва Озарбайжон инвестиция форумини ўтказишни таклиф этди.
Йиғилиш якунида иқтисодий ҳамкорликни чуқурлаштириш, кооперация ва қўшма ишлаб чиқаришларни ривожлантириш, шунингдек, инвестициявий ўзаро ҳамкорликнинг янги механизмларини яратишга оид асосий келишувларни ўз ичига олган қўшма коммюнике имзоланди.
