Ўзбекистон Президенти Шавкат Мирзиёев Россия Президенти Владимир Путинни мамлакатнинг миллий байрами – Россия куни билан самимий муборакбод этди. Мактубда ушбу сана рус халқининг бой маънавий мероси ҳамда ҳар томонлама тараққиёт сари интилишни акс эттириши таъкидланган.
Шунингдек, табрик хатида бугун мамлакатлар ўртасидаги икки томонлама алоқалар изчил кенгайиб, ҳудудлараро ва гуманитар ҳамкорлик янги суръат касб этаётгани қайд этилган. Яқинда Санкт-Петербург шаҳрида ўтган олий даражадаги музокаралар икки давлат ўртасидаги анъанавий дўстликни яна бир бор тасдиқлагани билдирилган.
“Ишонаманки, эришилган келишувлар Ўзбекистон ва Россия ўртасидаги дўстлик ва ўзаро манфаатли ҳамкорлик муносабатларини янада чуқурлаштириш, мамлакатларимиз ва халқларимиз фаровонлиги йўлида кўп қиррали шерикликнинг улкан салоҳиятини рўёбга чиқариш учун мустаҳкам асос бўлиб хизмат қилади”, дейилади табрик хатида.
Маълумот учун, 1990 йил 12 июнда РСФСР халқ депутатлари қурултойи томонидан “Россиянинг давлат суверенитети тўғрисидаги Декларация” қабул қилинган. Шу сабабли ушбу сана мамлакат мустақиллиги ва янги давлатчилигининг бошланиши сифатида белгиланган.Дастлаб (1992 йилдан) бу байрам “Давлат суверенитети тўғрисидаги Декларация қабул қилинган кун” деб аталган. 2002 йилдан бошлаб эса расман “Россия куни” деб ўзгартирилган.
