Бухорода 35 минг долларга симоб сотган шахсларга жиноят иши қўзғатилди. Бу ҳақда Давлат хавфсизлик хизмати хабар берди.
ДХХнинг Бухоро вилояти бўйича бошқармаси ходимлари томонидан Иқтисодий жиноятларга қарши курашиш департаменти ҳамда Миллий гвардиянинг ҳудудий бошқармалари билан ҳамкорликда ўтказилган тезкор тадбирда Бухоро шаҳрида яшовчи, 1998-йилда туғилган шахс ва Бухоро туманида истиқомат қилувчи, 1984-йилда туғилган фуқаро ўзаро тил бириктириб, Ўзбекистонда эркин сотилиши тақиқланган, уч дона флаконда бўлган жами 343 грамм симоб моддасини 35 минг долларга сотган вақтида ашёвий далиллар билан ушланган.
Ҳозирда уларга нисбатан Жиноят кодексининг 185-1-моддаси 2-қисми (рангли металлар, уларнинг парча ва резги чиқитларини тайёрлаш, олиш, улардан фойдаланиш ҳамда уларни ўтказиш қоидаларини бузиш) “б”, “v” бандлари билан жиноят иши қўзғатилиб, тергов ҳаракатлари олиб борилмоқда.
Унга кўра, бундай турдаги жиноят кўп миқдорда ва бир гуруҳ шахслар томонидан олдиндан тил бириктириб содир этилган бўлса, БҲМнинг 150 бараваридан 300 бараваригача миқдорда жарима ёки 300 соатдан 360 соатгача мажбурий жамоат ишлари ёхуд икки йилдан уч йилгача ахлоқ тузатиш ишлари билан жазоланади.
“Ҳурматли фуқаролар! Симоб ва уни ўз ичига олган бирикмаларни эркин сотиш, сотиб олиш, сақлаш ёки ундан маиший шароитда фойдаланишга рухсат берилмайди. Шунингдек, у кучли заҳарлилик даражасига эга бўлиб, мамлакатимиз ҳудудида эркин айланиши тақиқланади”, дея огоҳлантирди ДХХ.
