Наманган вилоятининг Давлатобод туманидаги ўйин клуби миллиардлаб маблағ айлантирилган ноқонуний тармоқ эканлиги аниқланди. Бу ҳақда Ички ишлар вазирлиги хабар берди.
Қайд этилишича, тезкор тадбир ўтказилиб, шартли харидор орқали 620 минг сўм маблағ қимор платформасидаги ўйинларни молиялаштириш мақсадида киритилган. Шундан сўнг тезкор тадбир иштирокчилари томонидан жиноий гуруҳ аъзолари қўлга олинган.
Хусусан, Чуст тумани Гулистон маҳалласида яшовчи 1985 йилда туғилган шахс шериклари билан биргаликда махсус жиноий гуруҳ ташкил этган. Текширувлар давомида жиноий гуруҳ томонидан махсус иловада 796 миллион 600 минг сўм лимит маблағи ва 44 миллиард 619 миллион сўм транзакция тарихи, шунингдек яна бир ҳисобда 115 миллион 622 минг сўм лимит ҳамда 26 минг миллиард 627 миллион сўмлик айланма, криптовалюта орқали эса 14 миллиард 623 миллион сўм пул айланмаси амалга оширилганлиги аниқланган.
Хабарга кора, тезкор тадбирлар давомида гуруҳ аъзолардан 26 990 АҚШ доллари, 73 миллион сўм нақд пул, 10 дона пластик карта, мобил телефонлар ва компьютер техникалари ҳамда пул санаш учун мўлжалланган аппарат далилий ашё сифатида холислар иштирокида олинган.
“Пул, манфаат ортидан билмаган ҳолатда, тушунмаган ҳолатда бу ишларга кириб қолганмиз. Тўрт-беш ойдан бери афсусдамиз”, дейди гумонланувчи.
Мазкур ҳолат юзасидан Ўзбекистон Республикаси Жиноят кодексининг 278-моддаси (қимор ва таваккалчиликка асосланган бошқа ўйинларни ташкил этиш ҳамда ўтказиш) иккинчи қисми “б” банди билан жиноят иши қўзғатилиб, гумон қилинувчи шахсларга нисбатан қамоққа олиш тарзидаги эҳтиёт чораси қўлланилган. Ҳозирда жиноят иши бўйича дастлабки тергов ҳаракатлари олиб борилмоқда.
