Самарқанд-Душанбе-Самарқанд йўналиши бўйича уч ой давомида амалга ошириб келинган авиарейс бутунлай бекор қилинди. Бунга ушбу йўналишга бўлган талабнинг пастлиги сабаб бўлган. Бу ҳақда “Asia-Plus” хабар берди.
“Тугатиш қарори йўловчилар сони рейсни давом эттириш учун етарли бўлмагани сабабли қабул қилинди. Ҳатто парвозлар фаол даврда ҳам самолёт тўлиқ тўлмаган”, дейилади Centrum Air авиакомпанияси баёнотида.
Компания вакилларининг билдиришича, рейсни бекор қилиш қарори вазият синчиклаб ўрганиб чиқилганидан сўнг қабул қилинган.
“Яққин келажакда бу йўналишдаги парвозларни тиклаш ҳақида сўз юритилмаяпти”, деб қўшимча қилган авиакомпания вакиллари.
Маълумот учун, мазкур йўналишдаги рейс жорий йилнинг 20 июль куни биринчи бор йўлга қўйилган. Уни Ўзбекистоннинг Centrum Air авиакомпанияси ҳафтанинг пайшанба ва якшанба кунлари амалга оширган.
