Бугун, 23 май куни Тошкент вилоятининг Тошкент тумани Келес шаҳарчасидаги янги қурилаётган бинода ёнғин содир бўлди. Бу ҳақда Фавқулодда вазиятлар вазирлиги хабар берди.
Маълум қилинишича, соат 13:39 да шаҳарчанинг Олмазор кўчасида жойлашган янги қурилаётган бинода ёнғин содир бўлаётгани ҳақида Тошкент вилояти ФВББга хабар келиб тушган.
Хабарга асосан, 2 та қутқарув бўлинмаси соат 13:45 да ҳодиса жойига етиб борган, ёнғин соат 13:48 да ўраб олинган ва соат 13:54 да тўлиқ бартараф этилган.
Ёнғин оқибатида янги қурилаётган бинонинг ер тўла қисмида тахминан 40 квадрат метр майдонда қурилиш чиқиндилари ёниб зарарланган.
“Ҳозирда ёнғиннинг келиб чиқиш сабаби ва етказилган моддий зарар миқдори аниқланмоқда”, дейилади хабарда.
