Туркманистонда эркак ухлаб ётган олти нафар фарзандини отиб ўлдириб, сўнг ўз жонига қасд қилди. Бу ҳақда “Turkmen.news” хабар берди.
Маълумотларга кўра, ҳодиса 21 июнь куни Тошҳовуз вилоятининг Гўрўғли туманида содир бўлган. Эркакнинг рафиқаси, яъни болаларнинг онаси Россияда ишлаган. 1984 йилда туғилган Муҳаммет Гулбаев қўлига милтиқ олиб, ухлаб ётган болаларини отиб ташлаган. Сўнг марҳумларнинг жасадларини тиғли буюм (лом) билан жароҳатлаган.
Дафн маросимида иштирок этган қишлоқ аҳолисига кўра, бир йил олдин мактабни тугатган катта қизи онасига қўнғироқ қилиб: “У бизни ўлдиряпти!” деб бақиришга улгурган. Аёл эридан бундай қилмасликни ўтиниб сўраган, аммо эркак болаларининг ҳеч бирини аяб ўтирмаган, кейин эса ўзини отиб ўлдирган.
Аёл дафн маросими куни Туркманистонга учиб келган. У уйга жасадлар олиб чиқилишидан бир соат олдин етиб келган. Қишлоқдошлари Гулбаев болалиги ва ёшлигида вазмин бўлгани, жанжалларда иштирок этмаганини айтган. Кейинчалик у эҳтиёт қисмлар савдоси билан шуғулланган ва чет элдан машина олиб келиб сотиб, яхши даромад кўрган.
Кунларнинг бирида уни Мари вилоятидаги автомобил олди-сотдиси билан шуғулланувчи бошқа шахслар қаттиқ калтаклаган ва Гулбаев бошидан оғир жароҳат олган. Шундан сўнг эркакнинг феъл-атвори кескин ўзгариб, ўзи психоневрология диспансерида рўйхатга олинган.
Гулбаевларнинг мактабни бир йил олдин битирган катта қизи кичикларини боқишда онасига ёрдам бериш учун дарҳол Ашхободга ишлашга кетган. Аёлнинг ўзи ҳам ўша вақт Туркманистонда ишлаган, аммо пул етишмовчилиги сабаб Россияга ишлашга кетган. У шу йилнинг баҳорида мактабни битириб, аттестат олган иккинчи қизини ҳам ўқишини давом эттириши учун ўзи билан Россияга олиб кетишни режалаштирганди. Оиланинг баъзи танишлари аёлнинг дарҳол иш топа олмаганини, эркак эса унинг кетиб қолгани ва пул юбормаётганидан шикоят қилганини эслаган.
Психоневрология диспансерида рўйхатда турган одамнинг уйида қандай қилиб милтиқ сақлаши мумкинлиги ҳамда маҳаллий полисиянинг бундан хабари бор-йўқлиги ҳақида савол туғилмоқда.
