АҚШнинг Техас штатидаги федерал иммиграция марказида содир этилган қуролли ҳужум иши бўйича 8 киши 30 йилдан 100 йилгача муддатга озодликдан маҳрум этилди. Бу ҳақда “Reuters” хабар қилди.
Қайд этилишича, прокуратура ушбу ҳодисани ички терроризм ҳаракати деб баҳолаган. Тергов маълумотларига кўра, 2025 йил 4 июль куни қора тактик кийимдаги “антифа” фаоллари Техаснинг Алварадо шаҳридаги АҚШ Иммиграция ва божхона назорати хизмати (ICE)нинг Prairieland сақлаш марказига ҳужум қилган. Ўқ узиш оқибатида бир нафар полициячи яраланган.
Суд ҳужжатларига кўра, суиқасдга уринишда айбдор деб топилган ва ҳужум ташкилотчиси сифатида кўрсатилган Бенжамин Сонг энг оғир жазо – 100 йил қамоқ жазосига ҳукм қилинган.
Форт-Уортдаги федерал судда яна 7 нафар судланувчига 30 йилдан 70 йилгача қамоқ жазолари тайинланган. Уларнинг аксарияти март ойида тартибсизликларни уюштираётганлик ва терроризмни қўллаб-қувватлаш каби айбловлар бўйича айбдор деб топилган эди.
Ҳимоя томони вакиллари эса судланувчилар иммиграция марказида сақланаётганларни қўллаб-қувватлаш мақсадида тинч намойиш ўтказишни режалаштирганини, гуруҳнинг “антифа” ҳаракати билан алоқаси йўқлигини таъкидлаган.
Бенжамин Сонгнинг адвокати Филип Хейс мижозининг ҳукм устидан шикоят қилиш ниятида эканини билдирган. Унинг сўзларига кўра, судланганлар “террорчилар эмас, балки ўз фикрини эшиттиришни истаган ёшлар”дир.
