Тошкент шаҳрининг Шайхонтоҳур туманида ўтказилган тезкор тадбирда катта миқдордаги гиёҳвандлик воситаларини “закладка” усулида турли локацияларга тарқатиб юрган шахс ушланди. Бу ҳақда Ички ишлар вазирлиги хабар берди.
Қайд этилишича, ички ишлар органи ҳодимлари томонидан Артём исмли шахс кўздан кечирилганда, унинг чўнтагидан 20 дона қора елим билан ўралган “гашиш” гиёҳвандлик моддаси топилган. Гумонланувчининг телефони текширилганда яна 14 та манзилда “закладка” усули билан беркитиб қўйилган гиёҳвандлик моддаларининг локациялари ҳам топилган.
Тезкор тадбир давом эттирилиб, гумонланувчининг яшаш ҳонадони кўздан кечирилганда у ердан 28 дона кўк рангли ва 9 дона қора рангли елим билан қадоқланган ҳамда шаффоф полиэтилен пакетга ўралган гиёҳвандлик моддалари, электрон тарози ва бошқа буюмлар аниқланган.
“Мени ушлашганда ёнимда 20 грамм гиёҳвандлик моддаси бор эди. Сўнг уйимдан ҳам гиёҳвандлик моддасини топишди. Барча ёшларга ва тенгдошларимга бу иш билан шуғулланмасликни тавсия этаман. Бу ишларнинг охири ачинарли ҳолатга олиб келади”, дейди гумонланувчи.
Билдирилишича, ҳолат юзасидан Жиноят кодексининг 273-моддаси 5-қисми (гиёҳвандлик воситалари, уларнинг аналоглари ёки психотроп моддаларни кўп миқдорда қонунга ҳилоф равишда сотиш) билан жиноят иши қўзғатилган. Гумонланувчига эса “қамоқ” эҳтиёт чораси қўлланилган.
