АҚШнинг Нью-Йорк шаҳридаги Sotheby’s аукционида нанотираннус динозаврининг ноёб скелети 47,3 миллион долларга сотилди. Шу тариқа у тарихдаги энг қиммат қазилма топилмалар орасида иккинчи ўринни эгаллади. Бу ҳақда CNN хабар берди.
Қайд этилишича, “Жоди” деб номланган скелетнинг дастлабки қиймати 6–9 миллион доллар атрофида баҳоланган. Бироқ аукционда унинг нархи анча юқорига кўтарилган. Бунга скелетнинг яхши сақлангани сабаб бўлган: бугунги кунда олимларга маълум бўлган нисбатан бутун нанотираннус скелетларидан атиги учтаси мавжуд.
Жодининг баландлиги тахминан 2 метр, узунлиги эса 6 метрни ташкил этади. Унинг тошқотган қолдиқлари 2019 йилда Монтана штатида яшовчи фермер аёл Жоди Пирсон томонидан топилган.
Нанотираннус узоқ вақт давомида алоҳида динозавр тури сифатида эмас, балки ёш тираннозавр деб ҳисобланган. Унинг қолдиқлари илк бор 1940 йилларда топилган бўлса-да, тадқиқотчилар яқиндагина уни мустақил тур сифатида тан олган.
Жоди скелетининг нархи динозавр қолдиқлари учун аукционда тўланган рекорд суммадан атиги 3 миллион долларга кам бўлган. Жорий йилнинг июль ойида Гас лақаби билан танилган тираннозавр скелети 50,1 миллион долларга сотилган. У шу пайтгача топилган энг йирик тираннозавр намуналаридан бири ҳисобланади.
Шу билан бирга, бундай қазилма қолдиқларнинг кимошди савдоларида сотилиши илмий ҳамжамият вакиллари танқидига сабаб бўлмоқда. CNN қайд этишича, олимлар ноёб топилмалар хусусий коллекционерлар қўлига ўтиб, жамоатчилик учун очиқ бўлмаган жойларда сақланиб қолишидан хавотирда.
“Биз нанотираннус ҳақиқатан ҳам мавжуд бўлганини эндигина билиб олдик, ҳозир эса энг яхши скелетлардан бири энг юқори нарх таклиф қилган харидорга сотиб юборилади. У музейга қўйилиб, болалар, оилалар ва кенг жамоатчиликни ҳайратга солиш ҳамда илҳомлантириш ўрнига, қайсидир коллекционернинг омборида йўқолиб кетиши мумкинлигини ўйлашнинг ўзи даҳшатли”, дейди Шотландиядаги Эдинбург университетининг палеонтология ва эволюция профессори Стив Брусатте.
Скелетни сотиб олган шахснинг исми ошкор этилмаган. Харидор қолдиққа бўлган барча ҳуқуқларни қўлга киритган. Бу унга скелет нусхаларини музейлар ва коллекционерларга сотиш имконини ҳам беради.
