Эронда Европадаги икки давлатнинг фуқаролигига эга бўлган икки шахс устидан суд жараёни бошланди. Улар “хорижий разведка хизматлари билан ҳамкорлик қилиш” ҳамда “сионистик режим (Исроил) фойдасига жосуслик”да айбланмоқда. Бу ҳақда “Reuters” хабар берди.
Маълумотларга кўра, шахси ошкор этилмаган айбланувчилар Эрон ҳудудига июнь ойида – Исроил ва АҚШ томонидан Эрон ядровий иншоотларига зарба берилган 12 кунлик урушдан тахминан бир ой олдин кириб келган. Улар тўқнашув бошланганининг тўртинчи куни Инқилобий гвардиянинг элита бўлинмалари томонидан ҳибсга олинган.
Бош прокурорнинг таъкидлашича, айбланувчиларнинг Караж шаҳридаги вақтинчалик истиқомат қилаётган уйидан мураккаб жосуслик ускуналари ва разведка воситалари топилган. Улар Эрон қонунчилигида кўпинча ўлим жазоси билан жазоланиши мумкин бўлган моддалар билан айбланмоқда.
Сўнгги йилларда Инқилобий гвардия ўнлаб икки фуқароликка эга шахслар ва хорижликларни, асосан жосуслик ёки хавфсизликка таҳдид сифатида баҳоланган айбловлар билан ҳибсга олиб келмоқда.
Ҳуқуқ ҳимоячилари ва айрим Ғарб давлатлари Теҳронни бундай ҳибслар орқали сиёсий босим ўтказишга уринишда айблаб келади. Теҳрон эса бу даъволарни рад этиб, ҳибсга олишлар фақатгина миллий хавфсизлик масалалари билан боғлиқ эканини таъкидлайди.
