Коррупцияга қарши курашиш агентлиги томонидан давлат харидларида шаффофлик ва адолатли рақобатни таъминлаш мақсадида ўтказилган ўрганишларда 9,3 млрд сўмдан ортиқ харидларда қонунбузилиш ҳолатлари аниқланган.
Жумладан, «Бинолардан фойдаланиш ва қурилиш-таъмирлаш ишлари дирекцияси» буюртмачилигида 1,74 млрд сўмлик, «Бекобод овқатланиш комбинати» МЧЖда 1,6 млрд сўмлик харидлар ўрганилган.
Урганч, Учқўрғон, Пискент ва Янги бозор туманлари, Навоий шаҳри ҳамда Сурхондарё вилоятидаги қатор тиббиёт, таълим ва ободонлаштириш ташкилотлари харидларида ҳам қонунбузилишлар қайд этилган.
Ўрганишларда давлат харидлари соҳасига оид қонунчилик талабларига зид равишда баҳолаш жараёнларида қонунбузилишларга йўл қўйилгани аниқланган.
Айрим ҳолатларда харид иштирокчилари ўртасида рақобатни чеклаш ҳолатлари кузатилган. Қонунбузилишлар турли ташкилотлар буюртмачилигидаги давлат харидларида қайд этилган.
Энг йирик ҳолатлардан бири 1,74 млрд сўмлик харидда, кейинги ҳолатлар эса 1,6 млрд, 1,55 млрд ва 1,43 млрд сўмлик харидларда аниқланган.
Аниқланган ҳолатлар юзасидан Агентлик томонидан тегишли тақдимномалар киритилган. Уларнинг натижасида харид комиссиясининг ғолибни аниқлаш ҳақидаги баённомалари бекор қилиниши таъминланган.
Ўрганишлар давомида тўпланган ҳужжатлар эса қонуний чора кўриш учун ҳуқуқни муҳофаза қилувчи органларга юборилган.
